ភ្នំពេញ៖ ប្រធានរាជបណ្ឌិត្យសភាកម្ពុជា លោកបណ្ឌិត សុខ ទូច បានថ្លែងឱ្យដឹងនៅក្នុងពិធីដាក់ឱ្យសម្ពោធជាផ្លូវការនូវ «វចនានុក្រមខ្មែរ» នាព្រឹកថ្ងៃទី២៥ ខែកញ្ញា ឆ្នាំ២០២៣ ថា រាជបណ្ឌិត្យសភាមានគម្រោងផលិតទឹកដោះគោជូរ ប័រ និងឈីស ហើយប្រសិនគម្រោងនេះដំណើរការបានជោគជ័យ នឹងបន្តបើកជាធនាគារគោ (គោចិញ្ចឹមយកទឹកដោះ) ដើម្បីចែកដល់កសិករ។
លោកបណ្ឌិត សុខ ទូច បានបន្តថា រាជបណ្ឌិត្យសភានឹងប្រមូលទិញទឹកដោះគោពីពលរដ្ឋដើម្បីយកមកច្នៃ ដើម្បីកាត់បន្ថយនៃការនាំចូលផលិតផលទឹកដោះគោមកកម្ពុជា។ លោកបានបញ្ជាក់ថាជាជំហានទី១ រាជបណ្ឌិត្យសភាកម្ពុជា សាកល្បងចិញ្ចឹមនៅស្រុកឆែប ខេត្តព្រះវិហារ ដែលប្រជាជនធ្លាប់តែប្រកបរបរចិញ្ចឹមជីវិតដោយការកាប់ព្រៃឈើ និងបាញ់សត្វ។
លោកសង្ឃឹមថា តាមរយៈគម្រោងនេះ ប្រជាកសិករនឹងងាកពីការកាប់ព្រៃឈើ និងបរបាញ់សត្វ មកជាបម្រើការនៅក្នុងឧទ្យានរាជបណ្ឌិត្យសភាកម្ពុជាវិញដូចជាការដាំស្មៅ ដាំដើមឈើ។
លោកថ្លែងដូច្នេះថា៖ «ប្រសិនជាជោគជ័យ រាជបណ្ឌិត្យសភានឹងបើកធនាគារគោដើម្បីចែកដល់កសិករចិញ្ចឹម ហើយរាជបណ្ឌិត្យសភាកម្ពុជាប្រមូលទិញទឹកដោះគោពីប្រជាជនមកច្នៃដើម្បីកាត់បន្ថយនៃការនាំចូលផលិតផលចេញពីទឹកដោះគោកចូលមកកម្ពុជា»។
លោក សុខ ទូច បានរំលឹកកន្លងមកដោយមានការគាំទ្រពីអតីតនាយករដ្ឋមន្ត្រីកម្ពុជា សម្តេចតេជោ ហ៊ុន សែន និងលោករដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន រាជបណ្ឌិត្យសភាបានសិក្សាពីការចិញ្ចឹមគោយកទឹកដោះនៅឧទ្យានរាជបណ្ឌិត្យសភាកម្ពុជា តេជោសែន ឬស្សីត្រឹប ដែលជាគម្រោងសាកល្បង ដោយបាននាំគោចិញ្ចឹមយកទឹកដោះចំនួន ១០០ក្បាលដែលជាពូជមកពីប្រទេសដែនណាម៉ាក។
លោកបន្ថែមថា ទន្ទឹមនេះរាជបណ្ឌិត្យសភាក៏បានសហការជាមួយសហគមន៍វ៉ាំងណាំយិនប្រទេសថៃក្នុងការ ជួយលើផ្នែកបច្ចេកទេស ហើយយើងក៏បានការអភិរក្សសត្វក្របី ការចិញ្ចឹម ពពែ ចៀមជាដើម៕
